Schweizer Geschichten

Es isch emol vor langer Zytt - z Amerika - s isch keibe witt
öbber gsi, wo gärn duet moole - und eso - ganz unverhoole
e luschtigs Müüsli het kreiert, wo hütt no über d Wält spaziert.
E jeede het dr Mickey gärn! - Het in Hollywood sogar e Stärn!
Ghörsch zu de Gleine oder Groose: due mit uns uff ihn aastoosse!
(e Usszug uss em Zeedel 2019)

Wotsch Du zfriide Fasnacht mache, erläbsch Du laider komischi Sache.
Die drey scheenschte Dääg wärde zer Krise, will e baar Type die Dir dien vermyse!
Anstatt fir uns Jungi e Vorbild z'sy, mache die Type unseri Illusione hii.
Mir als jungi Garde wänn dorum sage, mir mechte das nimm wyters verdrage.
Mir wähle das als Sujet und gehn uff d Strooss und stelle die Type e däwäg richtig blooss.
(e Usszug uss em Zeedel 2019)

Mit drei Johr kasch scho Änglisch schwätze, mit fünf no Schwizerdütsch in Fätze,
mit acht spielsch s dritte Instrumänt, dr Schwimmkurs sig do no erwähnt.
Mit 18 sottsch denn alles könne, obwohls dr niemets meh duet gönne.
Nid numme d'Eltere sinn 's Problem, sondern au das Schuelsystem.
Ob näbem Stuehl oder druff, jede Lehrer macht yss muff.
(e Usszug uss em Zeedel 2019)

Vor 90 Joor isch är geboore, mit groosse, runde, schwarze Oore.
Schwarze Ärm und schwarze Bai. Wyssy Händsche drait är zwai,
mit roote Hoose, gääle Schueh, em e hübsche Gsichtli no derzue.
Mit groossem, braitem Suppeschlitz und schwarzem, rundem Naasespitz,
so stoot är do, verdient Applaus, zem Wiegefescht, dr Mickey Mouse.
(e Usszug uss em Zeedel 2019)

Momentan könnt me fascht maine, s syg e Rarität, oder s git e kaine.
D Reed isch vo de Buebe, de wyffe, wo statt Drummle lieber Pfyffe.
Scho die Jüngschte könmme voller Stolz in d Stunde mit em lange Holz.
Au wenn sy s Talänt zuem Pfyffe bringe, wänn sie lieber d Schleegel schwinge.
E Trend wo me vo Männer-Glygge höört und wo so mänge Obmaa zümftig stöört.
(e Usszug uss em Zeedel 2019)