Schweizer Geschichten

D Mickey Muus isch 90 woorde, soozesaage hochbedaggd
doch isch si nit vo dääre Sorte, wo sich driber nit no beglaggt
Als Jubileeum duet si s fyyre, das sell is punggto Sujet styyre
und gottloob nimme lenger quääle, duesch d Mickey wääle, wirsch nit fääle
s Farbfärnsee, und das isch woor - gitts jetz scho au syt fuffzig Joor
(e Usszug uss em Zeedel 2019)

Es hett bi de Orang-Utan, hani glääse, e Maidli gää, e häärzigs Wääse.
So, Bappe, hogg aane, nimm Platz, isch die Padma nit e härzige Schatz?
Ich hoff, diini Fiess mache nonig weh, Jungdiirli hetts nämmlig noo vyyl meh.
Gecko, Giraffe, Gepard und au 's Lama will ich gsee, sunscht gits e Drama.
Nynzääsäggsefuffzig, waisch das no, isch e Panzernashorn uff d'Wält koo.
(e Usszug uss em Zeedel 2019)

Nur ains, das sott me nie vergässe - Blaschtig kamme gar nit ässe
nit nur wills kei Nährwärt hett - s isch will s dy Keerper uff kei Fall wett
In d Forschig sott me drumm Milliarde drystegge - ass d Fischli nimm mien am Blaschtigg verregge
s Isch an dr Zyt mol öbbis rächts zerfinde - wo ändlig dä Blaschtiggdrägg im Meer ka binde
Will wotsch das Iibel vom Wasser trenne - muesch dä Blaschtigg halt verbrenne
(e Usszug uss em Zeedel 2019)

Alles Gueti zum Geburtsdaag und blyb e so, wie de bisch.
Will di jeedi wahnsinnig guet maag und d JUGA aifach wichtig isch!
Gschlosse sage d Schnoogge: du bisch toll! Nimm dir s gröschte Stügg vom Kueche
und schloo dir dy Buuch mächtig voll. E JUGA wie di, muess me zerscht mol sueche.
Härzlig schnoogig - Dr Stamm, d Remyyse und die Alti Garde vo de Schnooggekerzli
(e Usszug uss em Zeedel 2019)

Woodstock isch jetzt scho lang passé, lägg was het me dert alles gsee!
Im 69, s greeschte Summerfescht, doozemool fir alli s Bescht!
Country, Blues, Folk und Pop, die Muusigvyylfalt dunggt is top!
Doch s allerbeschti Genre hänn sii vergässe, e Fescht ooni Fasnachtsmuusig isch vermässe.
Kai Piccolo, kai Baslerdrummle, kai Guggemuusig, so ne Fescht isch woorschins au bitz gruusig.
(e Usszug uss em Zeedel 2019)