Schweizer Geschichten

Sobald s'Graas z'hoch isch duet dr Roboter starte - Uff dr Santimeter genau maie die Maschiine di Garte
Suuge unseri Wohnig automatisch bis in d'Egge - Und mir könne uns in däre Zyt e bitzli aane legge
Zuekünftig git's s'Auti als sälbstfahrends Modäll - Alli beachte d'Verkehrsregle, keine fahrt z'schnäll
So gäb's viel weniger Unfäll und kum mee e Stau - Das wär bequem und süübereri Luft hätte mir au
S'git für d'Roboter no unändlich viili Mööglichkaite - Dr Richtigi könnti Mathe-Huusufgobe wie kai zwaite
(e Usszug uss em Zeedel 2019)

Dr alti Seebäär waigeret sich sis Schiff z'verloo, stolz duet äär am Styyrrad stoo.
Wit ewäg gsehn mir, wie äär untergoot und erheeben uns in unserem Boot.
Umgää vo Fisch, Hai, Kräbsli und Barsch, spiile mir junge Dyble e druurige Marsch.
Major, Dambuure, Pfyffer, Voordraab verabschiide dr Unglüggsraab in sy nasses Graab.
Duss us em Rauch, zrugg in dr Sunne, mergge mir, dr Fyyrdaifel het d'Schlacht gwunne.
(e Usszug uss em Zeedel 2019)

Dr glai Yysbäär dänggt nooch, är het scho vyyl gleert:
Dr Co2-Ghalt isch z hooch und d Balance isch gsteert.
Vyyl Lyt luege nur uff s aigene Gäld und nur ganz weenigi dänggen au an d Wält.
«Wääge de Mensche schmilzt bi uns s Yys! Daas find ych schon e bitzeli fyys,
und mii duet me wien e Wolf verjaage. Daas muess ych graad mym Mami saage!»
(e Usszug uss em Zeedel 2019)

Drey Dääg Räge, Blueme, Musig und Friide: wär's erläbt hett, wird vo vyle beniide.
Doch was blybt? E Kater, e Filmriss, Kommerz. Hütt isch Woodstock e Trade-Mark, e billige Scherz.
D'Stars vo dozmoll sinn hütt am Rollator (wenn's no goht), oder sy hänn ussgsunge und sinn scho lang doot.
Drum bsinne mer-ys, das isch my Rot, was bi däre Gschicht am Aafang stoot:
Au hütt no gitt's für «Drey Dääg Friide und Muusig» e Fescht, au do sinn dr Uncle Sam und dr Yankee liebi Gescht.
(e Usszug uss em Zeedel 2019)

Dr Micky Maus ghöört zu de alte, - vo allne gliebt e Wundergstalte!
Scho nüünzig isch är woorde - glaub joo nit, är syg gstoorbe!
Und au vergässe isch är nit, - är isch au hüt no hip und fit!
Us allne Löcher kömme Müüsli gschosse,
s wird Rimuss hüt zum Fescht vergosse.
(e Usszug uss em Zeedel 2019)