Schweizer Geschichten

Füürwehrmänner mache d Schlüüch barat, D Bolizey sperrt ab, jetzt hämmer dr Salat.
D Heggtigg isch grooss, me hört nur Gschrey, s Entsetze brait und d Bai schwär wie Bley.
Dr Luca hett grad gwüsst nach sym Ermässe, D Pirate vo Batavia kasch vergässe.
In däm Dail vom Vergniegisgarte, Sinn alli Mensche kurz vor em duurestarte.
«Schau mal Karl, wie das tut brenne, S Schlimmschte was bassiere hett kenne.»
(e Usszug uss em Zeedel 2019)

Der Achilles hett e Jungs bykoo. Isch dä trans*gender oder so?
Nai, doch der Zolli merggts jetz au: Dä Gorilla-Maa isch e Gorilla-Frau.
Drum föön mer gescheiter noomool aa: D Achilla hett e Buschi ghaa.
Doch d Affemuetter hett kai Schimmer, was sii söll due im Kinderzimmer.
S wird aim ums Buschi angscht und bang. Als Retter kunnt der Doggter Lang,
wos Äffli vo der Mamme drennt, zems zue sich z nää. Und s "Goma" nennt.
(e Usszug uss em Zeedel 2019)

S het alles contra, alles pro, esoo muesch du die Sach agoo.
Was het s Alte, was het s Naye, was wurd di Härz me erfraye.
Z Basel uf em Rhy - mien vyyli Beetli sy.
Oft isch s ebe halt esoo, S Alte muess fir s Naye goo
Aadie Keenig, bisch jetz nimme do - Ahoi Rhystärn, i waiss du machsch is froo.
(e Usszug uss em Zeedel 2019)

Nit nur in dr Mode, au in andere Schparte, duet dä Achtziger Boom entarte:
S git Computerschpiil, s isch fascht gemain, die sinn programmiert im Retrodesign,
die hänn Pixel so grooss, ass sogar e Blinde, ddr Wääg zum Level 10 ka finde.
Doch unbeschtritte dr grööschti Hit, syt's uf dr Ärde Schpiilzüüg git,
isch dr Rubik-Würfel; joo , dasch woor, au dä schtammt us de Achtziger Joor.
(e Usszug uss em Zeedel 2019)

Drum Finger uuse, s blybt drbyy, au z Basel hedds e Mängs Genie.
Mit gscheite Männer und mit Fraue wänn mir die Stadt in d Hööchi baue;
so wird die Stadt, mer finde s stargg, e Fortschridds- und e Wüssenspargg!
Denn öbbis mien mer scho no saage, bi dr Fasnacht kasch nid klaage,
doo sin mir z Basel und au z Rieche uf dr Wält die gailschde Sieche!
(e Usszug uss em Zeedel 2019)