Schweizer Geschichten

Hüt simmer lutt und mache Kravall, - s isch wider Zyt für e Festival!
Vyyl Schwäiss und ganz e Huffe Lärm, - s isch mega häiss, miir hänn das gärn!
Spüürsch wie dr Bode vom Bass vibriert, - wie dr DJ e Selfie no schnäll inszeniert,
wie im Moshpit ganz cool äin sy Läbe riskiert -
s isch wurscht, öb dä zletschtem mänd fascht no krepiert
(e Usszug uss em Zeedel 2019)

E jeede loot sy Mist lo ligge - D Stadt duet jo ein zuem Butze schigge!
Au bi eme kurze Rhyschwumm - Isch dä ganzi Drägg scho dumm
Denn de kasch sicher syy - Dä Drägg schwimmt dr hindedryy
Liebi Lyt und Rhyboard-Chiller - Und Teenie mit Hard-Drink Abfüller
Nämet doch Eure Abfallshit - Am Beste eifach sälbr mit!
(e Usszug uss em Zeedel 2019)

Neutraal, neutraal - s isch e Quaal
vo däm träumsch bi uns numme - und mir schigge wytter Waffe in dr Wältgschicht umme.
Unsers Wappe, wyss und rot - symbolisiert bluetrot dr Tod - während s Wyss fyr unseri Unschuld stooht.
Oh Schwyz, oh Schwyz, ych ha Angscht um di - ischs mit dym Friide jetzt verby?
Ich hoff, mir könne ihn no biz bhalte - für uns Junge und au für die Alte.
(e Usszug uss em Zeedel 2019)

Wär kennt si nit, die ganzi Gschicht - Vo Prinze, Häx und Bösewicht
So Määrli hän ys dröime loo - Und das isch no hit esoo
Dorum isch au d Gschicht beliebt - Vom Traumprinz, wo sich schwär verliebt
Harry Windsor isch sy Namme - Und Meghan heisst sy Härzensdame
Was zwüschen ihnen isch bassiert - Das hän mir do genau notiert...
(e Usszug uss em Zeedel 2019)

D Frau Fasnacht gseets und isch schockiert - «Was isch mit myne Frind passiert?
Bin ych die ainzig, traditionelli Konstante? - Kai Goschdym me klassisch, usser ych Alti Tante?»
Sy macht sich drum - s isch wirgligg kai Saiche - Uffe Wääg, durs Dunggel vom Morgestrach:
Dr Waggis froggt, mit ärnschtem Gsicht: «Was passiert mit unserer Fasnachts-Gschicht?
D Fasnacht isch doch e Ärb vo Wältkultuur - Doch mir Klassiker? - blyybe näb dr Spuur»!
(e Usszug uss em Zeedel 2019)