Schweizer Geschichten

Es isch jetz scho e Wyyli häär - so 100 Jöörli ungefäär
do isch e Zauberer uff New York ko - und het e Koffer mit sich gno
In dämm Koffer und das isch s Fantastische dra - hänn kuurligi Tierli ihri aigeni Wält ka
mit allem wo s bruucht, um artgerächt z lääbe - drumm kenne si deert au in dr Luft ummeschwääbe
(e Usszug uss em Zeedel 2018)

S isch jeedes Joor der gliichi Saich - Alli finde s biirewaich
Doch kurz vor Wiehnacht sinn si doo - Und d Finger loosch denn nit dervoo
Sie fluete wie verruggt der Määrt - Und jede waiss, si sinn nit Wäärt
Doch s liggt im Trend, me mues es ha - Nit dass der Nochber nääbe dra
Das vorhäär het und dermit braalt - Drumm wird s grad kaufft, dr Glaini straalt
(e Usszug uss em Zeedel 2018)

E Thai machts voor am Glaarablatz, Inseggte isst deert nit nur dr Spatz.
Soone Määlwuurm het Proteiin und macht di fit. E Curry-Wurscht schafft so eppis nit.
Dr McDonalds bringt im neye Joor woohrschiins e McWiirmli uuse, ooni Gfoor.
Mir Dybli geen jetz im Schitzemattpaargg hinde, amme go luegen, ob mir in de Bisch e Zvieri finde.
Soonen Amaisehuffe, es wird zer Gwoonet, länggt uns fascht schoon e ganze Moonet.
Dr Hunger uf dr Wält, dä kasch beände, wenn de uffem Grill statt Steaks duesch Grille wände.
(e Usszug uss em Zeedel 2018)

Ob Bulli, Thiischi, Schaal oder Kappe: Hesch Mörtsch, duets mit dr Karriere klappe.
Denn woorgnoo wirdsch, so viil ka me saage, wenn e männge Mensch di Mörtscht duet draage.
Das gilt nid numme für e groosse Staar, jeede ka das hüt mache, das isch glaar.
Das hänn au die junge Rolli kapiert und uff d Fasnacht 18 Mörtsch broduziert.
Vier Buechstaabe duesch an dr Fasnacht gsee, s heisst jetz üüberaal: B - R - J - G.
(e Usszug uss em Zeedel 2018)

Ganz Basel sitzt am Rhy, nur d avantGARDE macht Aprés-Ski.
Stilbewusst wie sunst au immer, hänn unseri Kleider de Markeschimmer.
Nur d avantGARDE isch so richtig geil, het money und de passendi style.
Elai mir könne sönnigi Rhymes, Löhnt euch belehre mir wänn nur eins;
Jede Tag meh Marke shoppe als de Pöbel, denn simmer wirklich die schiggste Vögel.
(e Usszug uss em Zeedel 2018)