Schweizer Geschichten

E glai wyss Dyybli draiht si Rundeli vom Glaibasel, Määrtplatz richtig Gundeli,
Doch gseet s nit ebbe Frau Maiers Hundeli, bim Rundeli richtig Gundeli.
Iber em Seibi graist s und schnäll isch glaar, vyyl schwaarzi Pinggt, e ryyse Mobb,
Fir das friidlig Dyybli isch s sonderbaar, und si Häärzli bebberlet vor Schogg.
S glay wyss Dyybli dänggt: Dä Mobb wird greesser, zimmli lut, do wird mir Angscht um s Härz
Was mache die jetz wider kabutt? Nur Eländ, Gschrey und Schmäärz.
(e Usszug uss em Zeedel 2018)

Zerscht will y mit Noochdrugg bedoone: Schwinge ghöört zu de Traditione
Bevor mer "Rufst Du mein Vaterland gsunge", hän unseri Vorfaare scho uff em Rütli gschwunge
Drmit d Demokratie z Basel duet glinge, dien mr drummle, pfyffe und schwinge
Drmit me jung und fröhlig läbt, isch Schwinge s BREO Ghaimrezäpt
(e Usszug uss em Zeedel 2018)

Sisch z Oobe am Sächsi - dr Zolli schliesst d Tüüre - und Gstalte, die kömme vo tief unde füüre.
Ganz hinde im Fante-Huus foots jewiils aa. S isch nonig lang här, mir dängge s liggt draa,
bim Baue hets sittlig, uss Richtig vom Haag, e Achs liicht verschoobe, knapp mitts uss dr Laag.
Syt däm liggt e Stai uss Ägypte halb offe und wird so bi Vollmond vo Mondstraale troffe!
Ganz langsam so seht me die Gstalte bitz gnauer - e sältsame Aablick, es macht is nit schlauer!
(e Usszug uss em Zeedel 2018 - "Nachts im Zolli")

Scho im Buech vo de Biecher stoot "Es werde Licht"
schyynts selli daas aaduure bis zem jüngschte Gricht!
Scho deert het d Abwärtsspiraale iire Lauf gnoo
Gwissi Grais saage: "D Wäält wuurd jo glyy undergoo!"
Vilicht hilft e Windraad oder Luftenergie?
Basel broobierts denn widder mit Geothermie!
(e Usszug uss em Zeedel 2018)

Y zaig euch grad wies funggzioniert - Brille aa - Dr Globus mutiert
Y lueg in my Umgääbig - bi am Stuune - Um mii umme verbreitet sich sofort gueti Luune
Anstatt de graue Rauchwolgge uss dr Induschtrii - Seeni Bluemefälder, Eihöörner - e Bilderbuechszenerii
Eso faabelhaft hani d Wält no nie vernoo - E simpli Brille und scho bisch doo
Wo de kasch uff de Eihöörner ummerytte - Oder au eifach spaziere, Sytte an Sytte
(e Usszug uss em Zeedel 2018)