Schweizer Geschichten

Dr Wickie isch gfitzt und schlau, daas kenne mr uus Gschichte.
Bim Wicky wisse mers nooni gnau, äär wirds denn scho no richte.
Dr Wickie gwinnt immer am Schluss, daas wämmer bim FCB au soo haa.
Dr Wicky drybt drum ooni Verdruss syyni Buebe tipptopp aa.
(e Usszug uss em Zeedel 2018)

E Schwoo maint: Basel toll, da stimmt der Preis, e-n-Ami schwärmt: O my god, it's very nice!
Numme: An der Ooberflechi, do isch's e Gnuss, aaber: Undedraa seet's anderscht uus!
Singgt der Peegelschtand, denn griegt me Soorge, me seht jetz daas, wo sunscht verboorge,
am Grund vom Fluss liggt und vergammlet, kuurz, d' Bleedhait vo vyyle het sich do versammlet!
(e Usszug uss em Zeedel 2018)

S het Mentsche, die finde Google e Wucht, bi andere fiehrt daas sofort zer Sucht.
Als Süchtli muesch nie lang glaage, scho ligsch bim Doggter uff em Schraage.
Aber das isch aigetlig jo wurscht, dr Aadriib kunnt vom Wissensdurscht.
Bi Google findsch, daas isch dr Drigg, daas und no meh mit nur aim Kligg.
(e Usszug uss em Zeedel 2018)

Kreativ syy, ebbis schaffe, das isch im Fall denn gar kai Schlägg,
e Gschicht erfinde isch vyyl Aarbed und dr Uffwand au e Drägg.
Drum hänn baar fuuli Schlaui tscheggt: Fantasie, das bruucht s gar nit!
S Rezäpt isch nämlig furchtbar aifach und scho hesch dr näggschti Hit:
Ob z Holly- oder Bollywood und au sunscht uff dere Wält,
mit e bitzli "copy - paste" kunnt me schnäll zu vyyl me Gäld...
(e Usszug uss em Zeedel 2018)

Mr läbe hütt - wär wötts bestrytte - wirgligg in rasante Zytte.
"Es eilt die Zeit im Sauseschritt" - kunsch mänggmool fascht scho nümme mit.
Und trotzdäm muess uff däre Ärde - alles no immer schnäller wärde.
Doch nit nur schnäller, höcher, besser - wytter, dicker, türer, nässer,
naj - superlativ muess alles sy - denn sunscht bisch out, bisch nümm drby!
(e Usszug uss em Zeedel 2018)