Schweizer Geschichten

Dr Timon und Pumba, die baide uffgweggte, mampfe am allerliebschte Inseggte!
Wenn de se ganz frisch wettsch ässe, darfsch s Ablaufdatum nit vergässe.
Nämme mr byspiilswyys d Aidaagsfliege, die wettsch nach drei Daag nimm "frisch" uffdischt griege!
Do schliesst sich au zem Mensch dr Booge, denn d Underernäärig het en bewooge,
Heugumper und Maade in d Burger z phagge, de Hipsters drfiir no e Batze ab z zwagge,
mir meege Pizza und Burger au soo und wänn d Grabbeldier Timon und Pumba drum loo.
(e Usszug uss em Zeedel 2018)

Es git allewyyl, me glaubt das kuum, jedes Joor e neye Boom.
By Klaider, Schueh und au der Sprooch, als Alte kunsch do nümme nooch.
Uff jeeder blutte Stell e Tattoo gmoolt, s Ässe wird gliiferet und nimme ghoolt.
Im Winter nimme vorusse zittere, sondern dinne chille, WhatsApp und no twittere.
Au neyi Wörter gits, me ka si kuum verstoo - EINHORNISIERT isch ains drvoo.
(e Usszug uss em Zeedel 2018)

Sinn baidi weder dumm no schwach, und hänn nit jeeden Oobe Krach,
entstoht denn uss däm Glück am Änd, e zfride Buschi mit Talänt,
wo unter Druck au nit erschlafft, nai durebysst und Grosses schafft.
E Arzt, wo näbscht em Operiere, duet Hundewelpe adoptiere.
Esoo dänggt mänggi Mamme froh, kuum isch daas Buschi ändlig doo,
und duet in ihrer Mueterrolle, däm Kindli Zyt und Liebi zolle.
(e Usszug uss em Zeedel 2018)

In dr ganze Wält isch d Schwyz bekannt, als e bsunders friidligs Land.
Nur ai ainzig Mool im Johr wird dy Traum vom wilde Kämpfe wohr,
denn kunnt e Schtüggli Vergangehait zrugg, wenn's zmitzt uf dr Dreiroosebrugg
am ene Summersamschtig dätscht und kracht an dr groosse Basler Wasserschlacht.
Vom Santihans und us dr Spale kömme Schare vo Vandale
und stürze sich wie wildi Dier uf d Find us em Horburg- und Bläsiquartier.
(e Usszug uss em Zeedel 2018)

Hesch d Noochricht gsee, grad am TV - Uff Facebook, Twitter gseesch es au.
Die Wält, die spinnt, das kaa me saage - Den arme Mensche goot's an Graage.
Ob Wescht, ob Oscht, ob nooch, ob färn - Es hänn sich lengscht nit alli gärn!
Statt Kompromiss und Fründschaft z schliesse - Dien si uffenander schiesse.
Au hit no frogsch di ganz bedroffe: Soll me, darf me, kaa me hoffe?
Mir hän's ys duure Kopf lo goo - Und d Antwort isch e glaasglars "Jo!"
(e Usszug uss em Zeedel 2018)