Schweizer Geschichten

D MUBA z Basel isch bekannt bi allne Lütt im ganze Land.
Schambbar frait sich Gross und Glai deert über all die LEGO Stai.
Bricklive - so nennt sich dä Hit und alli baue flissig mit.
Die glai Sara strahlt um d Wett, will si s scheenschte Auti hett.
Dr Fabian het Star Wars gärn, drum baut er sich e Todesstärn.
D Emma sehts, rollt mit den Auge, so Buebeziig ka si nit glaube.
(e Usszug uss em Zeedel 2018)

Kuum sinn mir Goofe uff dr Ärde - isch glaar, wie d Faarbe solle wärde.
Die Glai drait pink, dr Bueb drait blau - so isch das greeglet - hoorgenau!
Är duet schutte, si duet rytte - Punggt! - Das gilt fir alli Zytte!
Jä nai! Das muess jetzt uss de Kepf. Mir schnyyde ab, die alte Zepf.
Mir Junge stelle d Gschläächter glyych - vom Mensch bis hi zum glainschte Fyych.
Schryybe dien mir, dasch doch d Norm - in Männer- und in Fraue-Form.
(e Usszug uss em Zeedel 2018)

s ABC, das isch doch glaar, leert jeedes Kind in dr Primar.
Doch bruucht me statt em ABC, ebbis anders als wie mee.
So schiggt me mit em Delifoon, statt ABC, Emojicon.
Es wirggt e Täggscht, e greatyyve, wie modärni Hieroglyphe.
Jä, mit Emojis ka me jetze, s ABC komplett ersetze.
S fäält nur no, doch au das wird ko, e Drummle und e Piccolo!
(e Usszug uss em Zeedel 2018)

Mi Grosspapi holt siis alte Naatel us em Hoosesagg
Glains Display, Daschtatuur und nümme so uff Zagg
Mit Dobbelpunggt, Strich und Klammere haig's aagfange
So n'e SMS schriebe isch domols no e bitzeli länger gange
LOL, Mann Alte han ich zue ihm denn gsait
Är isch grad fuffzig und het's drum verdrait...
(e Usszug uss em Zeedel 2018)

Hinter de Hiigel niemerem richtig bekannt, dert liggt s Teletubbie-Land,
E mega Hype fir die ganz glaine Kinder und nadyrlig e riise Gschäft fir dr Erfinder.
Die modärn uffgmotzti Version isch zwor au kai Hit, aber es frait unsri Glainschte und schadet ne nid.
Ganz vyyl vo däm, wo me hytte im TiWi ka gsee, handlet vo Gwalt, vo Grieg und no vyyl mee.
Versteend uns doch, das wänn mir noonig gsee, uns intressiert halt dr Joker vo dr Jugend meh.
Mir leen de glaine d Fraid an iire Teletubbies, au wenn mir Teenies finde, s syg e ryyse Kabis.
(e Usszug uss em Zeedel 2018)